Hamethochts

<p>Hamethochts</p><p>Braid Scotland haes nae peer the warld’s lenth lang<br />For bonny ben or glen for burn or sea<br />Wide lochs an straths laich park an shieling hie<br />The lanesome muir an dinsome cities thrang;<br />For thesaury o pipe an dance an sang<br />For wale o words an flouer o poesie<br />Vieve checkit cleidin an proud history<br />Themed heritage aa ither lands tae dang;<br />The pent-braw hames new made frae tume mills black<br />The pitheid gear raired rustin tae the lift<br />The wharves drained dry o ships whaur nae graiths bang<br />The idle fowk made veicious by wark’s lack<br />Twined o a hame or thirled tae debt or thrift:<br />Braid Scotland haes nae peer the warld’s lenth lang.</p><p>Elaine Morton haes been scrievin aff an on for the feck o her life. Her daft days were misspent in lair o leids an music. She erst stertit scrievin hailly in Scots in 1998 muived tae it by the rich idiolects o friens in West Lothian an efter in East Lothian. She is for instance aye thankfu tae the chiel wha judged a photie-feenish atween twa rival dauncers wi the words “Ye’se are that close a pail o watter wadna pairt ye.” Mair dacent influences cam frae John Galt Robert Louis Stevenson an Hugh MacDiarmid. A muckle guddle o unfurthset scrievins awaits fowk tae come or the council cowp.</p>