Kumbara Colony

നീത സുഭാഷിൻ്റെ കുംഭാരക്കോളനി മനുഷ്യ മനസ്സുകളുടെ സങ്കീർണതകൾ അസാധാരണ ഭംഗിയിൽ ആവിഷ്കരിക്കുന്ന നോവലാണ്. ബത്ലഹേം പൊരുൾ തേടി റോസ് പെറ്റൽസ് കുംഭാരക്കോളനി എന്നിങ്ങനെ മൂന്ന് ഭാഗങ്ങളുള്ള ഈ കൃതി അമിഷയുടെ അസാധാരണ വ്യക്തിത്വത്തിൻ്റെ മൂന്ന് ജീവിത ഘട്ട കഥയുമാണ്. ഈ നോവലിലെ പ്രണയത്തിൻ്റെയും രതിയുടെയും ആവിഷ്കാരങ്ങൾക്ക് കാവ്യ സൗന്ദര്യം നൽകാൻ നീത സുഭാഷിന് സാധിച്ചിട്ടുണ്ട്. കുംഭാരന്മാരുടെ ജീവിതം എത്ര തന്മയത്വത്തോടെയാണ് അവതരിപ്പിച്ചിരിക്കുന്നത് എന്ന് നോക്കുക. നരവംശശാസ്ത്രപരമായി ഏറെ പ്രാധാന്യം അർഹിക്കുന്ന ഒരു ന്യൂനപക്ഷ സമൂഹമാണ് കുംഭാരന്മാർ. ലിപിയില്ലാത്ത ഭാഷയാണ് അവരുടേത്. സാംസ്കാരിക തനിമയും ഏറെയുണ്ടവർക്ക്. ഈ നോവലിൻ്റെ പ്രമേയത്തിനായി നീത സുഭാഷ് പാകപ്പെടുത്തി എടുക്കുന്ന മൺഭാവങ്ങൾ ദൈവീക സ്പർശം കൊണ്ട് അനുഗ്രഹിക്കപ്പെട്ടിരിക്കുന്നു. ഭാഷയിലെ കയ്യടക്കവും മനുഷ്യ മനസ്സിൻ്റെ സങ്കീർണതകളെ സ്പർശിക്കുന്നതിലെ മിടുക്കും ഈ നോവലിനെ മികച്ച വായനാനുഭവമാക്കി മാറ്റുന്നു.