Mulakat se Anant Tak

Yeh pustak ek saadharan bhent nahi hai. Yeh ek jeevan hai — tukdon mein bikhri woh poornata jise shabdon mein sametna asambhav sa lagta hai par phir bhi is pustak ke prashthon par woh asambhav prayaas kiya gaya hai. Yeh pustak main tumhein isliye nahi de raha ki tum ise padho balki isliye ki kabhi jab tum apne hi jeevan ko bhoolne lago tab in panktiyon mein apna aks pehchaan sako. Ismein ve sabhi roop samaahit hain jinse jeevan ke ayaamon ka pata chalta hai — ek mulaqaat ki aakasmikta se lekar man ke bheetar ki yatra tak jahan ek anubhav ki andekhi raah hai ek parivaar ki chuppi mein chhupi awaaz hai aur ek prem ki woh ansuni dhadkan hai jise niyati ne bade prem se pirowa hai. Yeh kitaab main se shuru hokar hum tak ki yatra hai. Ismein samay hai — jo kabhi saath bahta hai kabhi saamne khada hokar sawaal karta hai aur kabhi achanak kisi mod par humein khud se milwaata hai. Ismein jeevan ke ve sabhi rahasya samaahit hain jo mulaqaaton ki aakasmikta se shuru hokar ‘main aur meri zindagi’ ki gehraiyon tak pahuchte hain. Yeh pustak dikhati hai ki jab tum mere saath hoti ho to jeevan kaise apne sabhi rangon mein khil uthta hai — kabhi komal dhoop sa kabhi saanjh ki shaantima sa aur kabhi bheetar bahti ek nadi ki tarah — jo sab kuch chhooti hai par phir bhi maun rehti hai. Ismein dharm hai — jo keval karmakaand nahi balki aatma ki woh goonj hai jo naitikta aur karuna se upajti hai. Aur ismein main hoon — apni sampoorn asamarthata ke saath jeevan ki ek khoj mein ek anubhav mein ek prem mein. Pustak ka sheershak “Mulaqaat Se Anant Tak” mein mulaqaat keval ek yatra nahi hai balki ek anant mukt chetna hai. Aur anant keval antim chhor nahi balki man ki dhvani bhaavon ki tarang aur aatma ke bheetar bajta ek sangeet hai. Yeh naam — prem jeevan anubhav aur aatma-jaagruti ko ek saath sametata hai. Yeh sthaan baahri duniya mein nahi hai balki man ke bheetar — us maun mein hai jahan raagini ki bhaavnaayein aakaash ki chetna se milti hain. Yeh pustak antarmukhi aur darshanik gadya hai (Philosophical / Reflective Non-Fiction) jo mulaqaat se jeevan ke rahasyon aur ayaamon ko bareeki se dikhata hai. Aur lekhak aasha karta hai ki jeevan ke har saral dhoop-chhaav se bhare; aur kabhi raat ki tarah gehre jatil aur rahasyamayi bhaavon se tum jeevan ko ek aakaar de sako. Is pustak ki har pankti har anubhuti mein ek satya tumhara intezaar kar raha hoga — Woh satya jo tumne jiya khoya paaya... aur ab shaayad punah khoj sako. Isliye jab tum ise padho to keval aksharon ko mat dekhna — Uske peeche ke maun ko sunna. Jismein maa ki muskaan hai pita ki thakan hai prem ki prateeksha hai niyati ki chuppi hai aur aatma ki pukar hai. Yeh sab is pustak mein chhupe hain. Is pustak ke pratyek adhyay mein jeevan ke ve kshan darj hain — Jahan prem ne maarg dikhaya niyati ne pareeksha li samay ne thahar kar arth rachha dharm ne maun saadha parivaar ne jaden majboot ki aur anubhav ne aatma mein paripakvata laayi. Yeh pustak ek smriti hai ek anubhuti hai ek sangeet hai — jo keval tumhaare liye hai. Janmdin ki saumya snehil aur aatmiy bhent. Yeh ek jeevit darpan hai — jo tumhein tumhaara hi jeevan lauta dega ek naye rang ek naye rahasya ek naye aalok ke saath. Agar is pustak ko padte waqt tum apne bheetar ke jeevan ko sun sako to jaan lena — yeh keval ek uphaar nahi balki tumhaare jeevan ka darpan hai.Aakash Gautam Dilli ke ek madhyamvargiya parivaar se aane waale ek samvedansheel aur vicharshil yuvaak hain. Unka jeevan un anginat yuvaao ka pratinidhitva karta hai jo sapno ko saadharan paristhitiyon se seenchte hain. Janm aur prarambhik shiksha Dilli mein hui lekin unki drishti sirf sheher ki bhagdaud mein simit nahi rahi. Woh jeevan ko gahraai se samajhne aur parakhne wale vyakti hain. Aakash ne apni uchch shiksha Agra Vishwavidyalaya se Hindi Sahitya mein Snatakottar karke poori ki. Yah shiksha unhone Hathras Uttar Pradesh ke ek shaikshik vaataavaran mein grahan ki jahan Hindi ke prati unka anuraag aur gahra hua. Padhai ke saath-saath woh Dilli se stenography bhi poori kar chuke hain jo unke jeevan mein vyaavaharikta aur aatmanirbharta ka parichalak hai. Iske alawa woh ek private company mein banker ke roop mein kaaryarat hain. Aakash keval ek chhaatr ya ek karmchaari nahi hain woh ek lekhak ek kavi ek jeevan-drashṭa hain. Unmein jeevan ke har pehlu ko samajhne aur use shabdon mein dhaalne ki teevr laalsa hai. Woh prem peeda sangharsh aur maun ko kavita mein dhaalte hain. Unki kavitaon mein ek adrushya aantarik yatra ki jhalak milti hai jahan paathak na keval padhta hai balki anubhav bhi karta hai. Dinacharya mein woh sanyamit hain – pustakein lekhan ekaant aur vicharshil samvaad unka sansaar hain. Unhe chai ki chuskiyon mein vichar milte hain aur akelaypan mein kavita ke phool khilte hain. Aakash ka jeevan ek aisi yatra hai jo baahri duniya se shuru hokar antar-aatma ki gehraiyon tak jaati hai. Woh apne anubhavon ko keval apne tak simit nahi rakhte balki unhein shabdon ke maadhyam se sahej kar doosron se saanjha karte hain.