Riba Kaya

<p>Riba Kaya</p><p>Kore kore! Bai di pabou aboami ta pasa di patras. </p><p>Miéntras e promé figura ta kore duru bai pèrdè den un hanchi skur e ta grita: Na unda nos ta topa?</p><p>Chin e kontesta ta bin di e direkshon kontrali. Esei ta e último palabranan promé ku tur dos figura skur disparsé den skuridat. </p><p>Zonido di pianan pisá i un rosea hanshá ta trata na pèrsiguí nan. Kachónan ta blaf sin miserikòrdia. Skuridat ta skonde e dos suhetonan. </p><p>Niun hende no ta mira nan mas. Nochi ta skur. Nubianan ta tapa e tiki luna ku tin. Hanshá sodá i rabiá un hòmber ta keda para na kuminsamentu di e kaya smal skur i sushi kaminda el a mira e último suheto disparsé aden. Drenta òf no? Kòrda e malechor ta skondé tras di kualke barí òf muraya ku un palu kla pa batié!</p><p>Ku duele e ta pensa riba su pòtmòni ku 200 florin aden. Ken a mand'é bin den e bario skur aki? E ta disidí di bèl Polis ounke ku e sa ku nan lo no por hasi nada. E no a mira ken a atrak'é i e lo no por duna un deskripshon. Solamente e sa ku nan tabata dos. Nèt ora e bira pa bai su outo bèk e ta mira den su rayo di wowo su pòtmòni bentá kantu di kaya. E ta bula riba dje. Manera el a pensa e pòtmòni no tin e sèn aden. Su sèn a disparsé. Aliviá e ta mira ku maske su reibeweis papelnan i sédula tei ainda...</p><p>Hopi leu for di dje e dos amigu atrakadó ta topa otro. Nan ta sintá riba stupi di un restorant chines den nan mes bario. </p>