Safalta Ke 5 Mahan Siddhant

About the Book: Yeh chamatkaari pustak un sabhi vyaktiyon ke liye samarpit hai jo safalta prapt karna chahte hain athwa jinka jeevan mein koi lakshya hai. Aur uski prapti ke liye kisi shaktishaali maadhyam ki talash kar rahe hain jiske dwaara ve apne sapno ko hakikat mein badal sake. About the Author: Neeraj Kumar Yadav ek madhyavargiya parivaar se sambandhit 19 varshiya yuva hain. Inke pita Roopnakesh Yadav ek kisan hain aur inki mata Rajesh Devi grihni hain. Yeh apne pita ke saath pashupalan aur krishi kaam karte hain. Inka gaon Sundarpur Uttar Pradesh rajya ke Sambhal jile ka sabse gareeb gaon hai. Jahan na to koi school hai na koi doctor ki dukaan na pakki sadke hain aur sabse vishesh baat yeh hai ki poore gaon mein aisa ek bhi vyakti nahi hai jo kisi sarkari naukri par kaaryarat ho. Jiska mukhya kaaran hai yahan ki asikshitata. Vidyalaya na hone ke kaaran yahaan ke adhikansh log asikshit hain. Inka yeh gaon Sundapur itna pichda gaon hai jahan logon ko barsaat ke mausam mein dal-dal jaise dikhne wale rasto ko paar karke nikalna hota hai. Is gaon mein jyadatar makan bina plaster aur bina paint ke hain. Apne gaon ki is durdasha ko dekhkar inhe kisi motivation ki zarurat nahi padi jeevan mein kuch bada karne ke liye prerit hone ki. Isliye Neeraj Kumar ne bachpan se hi yeh thaan liya tha ki main apne gaon ke vikas aur samaj sudhaar ke liye jee tod mehnat aur nirantar prayaas karunga. Chahe iske liye mujhe mera poora jeevan samarpit kyon na karna pade. Apne is sankalp ka paalan karte hue inhone apne gaon se 12 kilometer door sthit Anupshahr ke L.D.A.P. Inter College se 12vi ki pariksha pass ki. Yeh pratidin 12 kilometer cycle chala kar vidyalaya padhne jate the. Apni is mehnat ke kaaran inhone 12vi ki UP board pariksha mein poore pradesh mein saatva sthan haasil kiya. Inke mata-pita ne inka vivaah 17 varsh ki alpayu mein Anjali naam ki ladki se kara diya. Ab inki ek beti bhi hai. Vartaman samay mein Neeraj Kumar Chartered Accountant banne ke liye padhai kar rahe hain. Yeh batane ki avashyakta nahi hai ki Bharat mein Chartered Accountant ki pariksha doosri sabse mushkil pariksha hai. Apni padhai karne ke liye yeh ek company mein 12 ghante ki naukri karte hain aur baaki samay apni padhai aur apne lakshyon ko poora karne ke liye lagate hain. Yeh bahut hi shaant vyavhaarik aur karmshil vyakti hain. Inhone ab tak business safalta lakshya prapti aur manovigyan se sambandhit kareeb 200 kitabein padhii hain. Isliye inhe bahut si samasyaon unke samadhanon aur kai vishayon ka kaafi behtareen gyaan hai. Jiska kaaran unke mitr aur adhikansh milne wale log ise salah maangte hain. Inhone ab tak teen aisi kitabein likhi hain jo safalta prapti berozgaari ka kaaran gareeb parivaron ki samasya adi ko darshati hain parantu unmein se abhi ek bhi publish nahi hui. Inke jeevan mein bahut kathinai aayi parantu inhone apne dridh sankalp ko kabhi nahi toda aur poore atmavishwas ke saath bade lakshya ki prapti ke liye nirantar prayaas karte rahe. Bhale hi yeh gareeb hain aur unke paas kuch nahi hai parantu unke vichar aur unki soch bade-bade arabpatiyon aur safal logon se bhi kai zyada badi hai. Aur yeh cheez inhe jeevan mein bahut aage lekar jayegi. Inke aise hi gunon ke kaaran adhikansh log inhe pasand karte hain aur unke saath samay bitana chahte hain. Unki safalta ka mukhya kaaran inka atmavishwas hai. Yeh maante hain ki jo mujhe aata hai use main kar loonga aur jo mujhe nahi aata use main seekh loonga. Unki yeh visheshataayein ek din inhe jeevan mein badi safalta tak lekar jayengi.