Sahanam|Malayalam Novel by P S Prabhavathi|Paridhi Publications

...പണത്തിനോടുള്ള ആർത്തി തന്നെ എങ്ങുംകൊണ്ടെത്തിച്ചില്ല എന്ന തിരിച്ചറിവിൽ സുകു ഓരോ ഗംഗാസ്നാനവും മുങ്ങിനിവർന്നു. തന്റെ മക്കളോ? അന്ന് രാത്രി അയാൾ മറ്റൊന്നും ഓർക്കാതെ പാർവ്വതിയെ കെട്ടിപ്പിടിച്ച് സുഖമായുറങ്ങി. അവൾ പകർന്നുകൊടുത്ത ചായക്കും അവൾ വിളമ്പിക്കൊടുത്ത കുഞ്ഞിക്കും അവൾ വിരിച്ചുകൊടുത്ത കിടക്കയ്ക്കും രുചിയും സുഖവുമുണ്ടെന്ന് അയാളറിയുന്നു. മൗനത്തിന്റെ സൗന്ദര്യം പാർവ്വതിയുടെ കണ്ണുകളിൽ നിന്ന് അയാൾ ചുംബിച്ചെടുത്തു. വസ്‌തുവിനേക്കാൾ രുചി മനസിന്റെ അനുരാഗത്തിലാണെന്ന് അയാൾ അറിയുന്നു. ജീവിതം മുഴുവൻ മൗനം കൊണ്ടളന്ന സ്ത്രീയാണവർ. സ്വന്തം അമ്മയും പ്രിയപ്പെട്ട പെണ്മക്കളും തള്ളിപ്പറഞ്ഞു. കഴിവില്ലാത്തവളെന്ന്. എന്നിട്ടും ആത്മഹത്യയെന്ന് ആലോചിച്ചിട്ടുകൂടിയില്ല. അത്രയ്ക്ക് സ്നേഹമായിരുന്നു അവൾക്ക് എല്ലാവരെയും...