Sethu ezhuthu jeevitham kadhakal

മലയാള സാഹിത്യത്തില്‍ വേറിട്ടു നില്ക്കുന്ന എഴുത്തുകാരനാണ് സേതു. പ്രമേയ വൈവിദ്ധ്യംകൊണ്ടും രചനകളുടെ ആഴംകൊണ്ടും നാളെയുടെ എഴുത്തുകാരനായി അദ്ദേഹം അടയാളപ്പെടുത്തപ്പെട്ടു. പാണ്ഡവപുരം എന്ന നോവല്‍ ഇംഗ്ലീഷ് ഉള്‍പ്പെടെ ആറു ഭാഷകളിലേക്ക് വിവര്‍ത്തനം ചെയ്യപ്പെട്ടു. മലയാളത്തിലും ബംഗാളിയിലും ചലച്ചിത്രാവിഷ്‌കാരങ്ങളുണ്ടായി. ഇന്നും ആ നോവല്‍ വായനയ്ക്കും പുനര്‍വായനയ്ക്കും വിധേയമാകുന്നത് കാലമെന്ന പ്രതിബന്ധത്തെ അതിലംഘിക്കാന്‍ ആ കൃതിക്കു കഴിഞ്ഞു എന്നതിനാലാണ്. പതിനാറിലേറെ നോവലുകള്‍ പന്ത്രണ്ടിലേറെ കഥാസമാഹാരങ്ങള്‍. കേരള സാഹിത്യ അക്കാദമി അവാര്‍ഡ് (1978 82) കേന്ദ്ര സാഹിത്യ അക്കാദമി അവാര്‍ഡ് വയലാര്‍ അവാര്‍ഡ് മുട്ടത്തുവര്‍ക്കി അവാര്‍ഡ് ഓടക്കുഴല്‍ പുരസ്‌കാരം തുടങ്ങി നിരവധി അംഗീകാരങ്ങള്‍ സേതുവിനെ തേടിയെത്തി. സൗത്ത് ഇന്ത്യന്‍ ബാങ്കിന്റെ ചെയര്‍മാനായി ഔദ്യോഗിക ജീവിതത്തില്‍നിന്നും വിരമിച്ച സേതു തന്റെ തിരക്കിട്ട ജീവിതത്തിനിടയിലാണ് മൗലികമായ ഇത്രയേറെ കൃതികള്‍ എഴുതിയിട്ടുള്ളത്. എം ഗോകുല്‍ദാസ് സേതുവുമായി നടത്തിയിട്ടുള്ള ദീര്‍ഘഭാഷണങ്ങള്‍ക്കും അന്വേഷണങ്ങള്‍ക്കും ഒടുവിലാണ് ഈ കൃതി തയ്യാറാക്കിയത്. സേതുവിന്റെ ഏതാനും കഥകള്‍ ഈ ജീവിതകഥയ്‌ക്കൊപ്പം ചേര്‍ത്തിട്ടുണ്ട്. സേതുവെന്ന എഴുത്തുകാരനെ അടുത്തറിയാന്‍ അദ്ദേഹത്തിന്റെ കഥകളിലൂടെ സഞ്ചരിക്കാന്‍ ഈ കൃതി നമ്മെ സഹായിക്കും.