Sulagta Kashmir Sikudta Loktantra

Haal hi men Bhartiya Sansad ne desh ke sanghiya Dhaanche aur loktantrik charitra ki jadon ko hameshaa ke liye kamzor kar dene waala ek faisla kiya. Ek gair samvaidhanik prakriya se nikle hue is faisle ke tahat na sirf jammu-kashmir kaa vishesh darzaa chhin gaya balki woh us nyuntam swaaytatta se bhi marhoom ho gaya jo anya rajyon ko mili hui hai. Is faisle ko thopne ke liye poore rajya ki sanchar vyavastha thapp kar di gayee Kashmir ko ek viraat jelkhaane me tabdil kar diya gaya. Aaj kashmir me itni badi sankhya me sena aur ardha sainik balon ki tainati hai jitni dunia ke kisi kone me nahin hai. Yeh pustika isi sharmnaak aur dahshatnaak aitihasik lamhe ke mukhtalif pahluon ki padtaal hai.